Elea Argitaletxeak eta Elorrioko Txintxirri Ikastolak bultzatutako lan honek Bizkaiko hamar idazle iaioen lanak biltzen ditu. Itxuraz ez daukate lotura tematikorik, idazle bakoitzak askatasun osoz landu baitu bere kontakizun propioa, narrazioaren beraren mesedetan. Baina liburua literaturatik haratago doa, eta idazleen konpromiso etenbakoa arnasten da hor, lerro artean. Bizkaiko Ikastolen helburuekin bat datoz idazleak ere: euskara bultzatu eta euskal kultura sustatu.

Honela, irakurleak Unai Elorriaga, Julen Gabiria, Gotzon Hermosilla, Gontzal Mendibil, Leire Bilbao, Miren Agur Meabe, Igor Estankona, Jon Arretxe, Manu Etxebarria eta Arrate Egañaren testuekin gozatzeko aukera izango du. Ipuin arin eta ulerterrazak, euskara ederrean idatziak, batuaz zein bizkaieraz. Edonola ere, garai nahasi hauetarako pilula aproposa.

XXI. mendeko Ikastola eraikitzen
Liburu honek zenbait idazle bizkaitarren kontakizunak batzen ditu; idatziek ez daukate euren arteko elkarloturarik, baina irakurleak ikuspegia zabalduz gero, letren artean, aparteko zentzu berezia aurkituko du. Puzzle baten antzera batu eta euskal literaturak Elorrioko Txintxirri Ikastolari ematen dion "muxua" sentitzen dut. Zabaldu begiak eta kontaketa bakoitzean, istorioen azpitik, ikastolen proiektuaren ardatz nagusietako batek isla zuzena duela atzemango duzue: euskara eta euskal kultura ezagutu, maitatu eta zabaltzearen erronka, alegia.

Elorrioko Ikastolak 2006an herritik mundura eta mundutik herrirako Ibilaldia egin nahi du, norabide biak jorratuz; horrela, urratsez urrats, gure identitate izaera sustrai sendoetan errotuz, aldapan gora abiatuko gara, suertatzen diren oztopoak saihestuz eta gero zubiak edonora eraikiko ditugu, beti pentsatu izan baitugu aniztasunak aberastu egiten gaituela eta mugak irudimenean dauden marrak besterik ez direla.

Bide honetan zehar tipi-tapa goazelarik, tarteko helmuga bat daukagu: 2006ko maiatzaren 28an Ikastolak, batzen gaituena lelopean, Ibilaldia ospatuko du, euskararen jaialdi nagusietako bat; aukera aparta euskararen alde gauden guztiok elkarrekin bidea egiteko. Elorrioko Txintxirri Ikastola aspaldi hasi zen bere bidea egiten, 1968an, eta geure izerdiak bota arren fresko-fresko dihardugu kalitatezko hezkuntza euskalduna eskaintzen. Ibilaldiarekin geure proiektua sendotu egingo dugu, Ikastola XXI. mendeko bailaran kokatuz.

Azkenik, idazleei bihotz-bihotzez eskerrak ematea baino ez zaigu geratzen.

Gonbitea egina dago: maiatzaren 28an danok Elorrixora!

Iñaki Erroz Aizkorbe
(Elorrioko Txintxirri Ikastolako zuzendaria)