New York. Urteak daramatza Gotzon Garatek etxe-orratzen hirira bidaiatzen. Udaldia bertan zukutzen du idazleak, Counseling Center-en, behar duen edonori aholkuak eta laguntza ematen. Garatek han jasotako pasadizuekin osatu du, batez ere, lan berri eta zirraragarri hau, eta orrialdez orrialde agertzen zaizkigun istorio gordinek erakusten digute gaur egun New York-ek pairatzen duen egoera kontrajarria eta paradoxikoa. Munduko hiririk boteretsuena da, bai, baina barne arazoz beteta dago; gainera, munduko beste herrialdeek mesfidantzaz begiratzen diote, betidanik izan duen jarrera belizista dala-eta (aspaldi honetan areagotu egin den jarrera).

Idazleari agor ezinezko kontagaia ematen dio horrek, hots, legez kanpo bizi den gizarteak berak (hilketak edonon, mafiaren maltzurkeria, prostituzioaren arazoa, drogak, bahiketak, polizia ustelakÉ), kontraesanez jositako hiri handiak, amaibako nahasteak, pentsakera ezberdinez osotutako gizarteakÉ

"Ez dago jendearen bizitza baino eleberri edo ipuin jakingarriagorik"!, dio Gotzon Garatek berak liburuaren atarikoan. Eta bertan agertzen dituen 36 istorioek hala erakusten dute. Horra hor lan txinpartatsu honen haria, piperra eta gatza: gizakion bi alderdiak, argia eta itzala. New Yorkeko kroniken ondotik beste hamasei ipuin sartu ditu idazleak, liburua biribiltzeko aproposak denak.

Lan arina eta bitxia osatu du oraingo honetan Gotzon Garatek, betiko bere euskara ederra eta ulerterraza erabiliz. Esan bezala, kontu periferikoak dira, idazlearen inguruan dantzan dabiltzanak, egilea xaxatzen dutenak, eta, bide batez, irakurlearen kontzientzia ere dantzan jarriko dutenak, kontakizun txikienak ere hausnarketarako bide ematen baitu.

Gotzon Garate Elgoibar, 1934

Filosofian doktore, Teologian eta Filologia Erromanikoan lizentziatua; Euskal Literaturan katedratikoa Deustu Unibertsitatean. 1978an Euskal Filologia karrera sortu zuen Deustun bertan. Euskal Herriko idazlerik irakurrienetakoa da.